Mat 19:16-30 | YomNWM | STEP | Buna mutu wumosi wufikama vaba Yesu ayi wunyuvula : —A Nlongi, diambu mbi dimboti phanga muingi ndibaka luzingu lu mvu ka mvu e ?

Matthew 19:16-30

Zimvuama ayi Kipfumu ki Nzambi

(Malako 10.17-31 ; Luka 18.18-30)

16 Buna mutu wumosi wufikama vaba Yesu ayi wunyuvula :

—A Nlongi, diambu mbi dimboti phanga muingi ndibaka luzingu lu mvu ka mvu e ?

17 Yesu wumvutudila :

—Bila mbi wukunguivudila mu diambu dimboti e ? Zaba ti wumosi kaka widi wumboti. Vayi enati tidi kota mu luzingu buna wufueti keba Mina.

18 Mutu beni wunyuvula :

—A Mina mbi miomi e ?

Yesu wuvutula :

—Kadi vonda, kadi vanga kitsuza, kadi yiba, kadi telama kimbangi ki luvunu. 19 Kinzika dise diaku ayi ngudi aku ayi zola ndiaku banga bobo weta kukizodila ngeyo veka.

20 Ditoko beni dituba :

—Ndieta keba Mina mioso miomi vayi mbi bikambulu diaka va minu e ?

21 Yesu wumvutudila :

—Enati tidi ba mutu wufuana ; yenda mana sumbisa bima biobi bidi yaku bosi vana kuidi minsukami, buna ma wubaka kimvuama ku Diyilu, bosi yiza wundandakana !

22 Ditoko buna kawa mambu mama, wuyenda mu kiadi, bila kimvuama kiwombo kiba yandi.

23 Bosi Yesu wukamba minlonguki miandi :

—Bukiedika ndikulukamba ti didi diambu diphasi kuidi mutu widi kimvuama mu kota mu kipfumu ki Diyilu. 24 Ndikulukamba diaka ti kadi kuandi phasi kuidi kamela ^{▼▼Kamela : mpila bulu kidi banga mpunda. Kikubuku mu natanga bizitu mu dikanga ayi kieti nuanga nlangu wuwombo.} mu viokila va divudu di tsoma vayi bika kuidi mutu widi kimvuama mu kota mu kipfumu ki Nzambi.

25 Minlonguki misimina buwombo mu diambu di mambu momo, miyuvula :

—A buna nani lenda vuka e ?

26 Yesu wuba sungimina bosi wutuba :

—Kuidi batu malendi baka bu vangimina ko vayi kuidi Nzambi mamo malenda vangama.

27 Bosi Piela wunyuvula :

—A beto tumana bika bima bioso mu diambu di kulandakananga, buevi buela bela mu diambu dieto e ?

28 Yesu wuba vutudila :

—Bukiedika ndikulukamba ti thangu mambu moso mela kituka mamona ayi bu Muana Mutu kela vuanda va Kundu kiandi ki Kipfumu mu nkembo, beno lundandakana, luela vuanda va kumi bikundu biodi mu diambu di sambisa kumi makanda muadi ma Iseli. 29 Bosi woso mutu bikidi kani zinzo ziandi, kani bakhomba bandi zi babakala, bakhomba bandi zi baketo, kani Dise diandi, ngudi andi, bana bandi voti zitsola ziandi mu diambu diama wela baka bima biandi mu zikhama di zikhumbu ayi wela tambula luzingu lu kalumani. 30 Vayi batu bawombo mu bobo badi buabu batheti bela ba batsuka ayi bobo badi buabu batsuka, bela ba batheti.